「中港大戰」嘅餘波，喺傳媒層面雖然已經告一段落，但在政經圈子中，仍然係熱鬧話題。近期最多人談論嘅，當然就係中大校長沈祖堯批評學生睇直播時噓國歌。其實中大生當晚噓國歌無乜人有留意到，沈校長要咁高調出招教仔，做法並不尋常，事件背後，原來又係同梁特一班人有關。近日茶餘飯後，唔少人都講起沈校長批評學生嘅網誌，沈祖堯平日咁重視「好人校長」形象，無理由會讓自己捲入呢類風波。有愛國圈子老友報料話，沈祖堯今次原來係買梁特怕，先至會近乎被迫寫篇惹火網誌。中大在「中港大戰」當晚，校園直播賽事，賽前奏國歌時，一班「不嗅米氣」的同學仔發出噓聲。成件事其實無乜人留意到，只得一篇即時新聞報道，但竟然都被梁特圈子的人睇中，成為佢教訓中大的「有力工具」。
據聞，梁特聲稱事關重大，事後立即向人氣校長沈祖堯問罪，又在建制圈子中高調批評，順便踩多沈祖堯兩腳。沈祖堯見對方來勢洶洶，又豈敢造次？拿拿聲寫篇網誌當「沙冧」交貨。中大學生跟舊生見到校長「跪低」，好自然會失望，但若果大家從大局睇，校長捱一棍做一次醜人，點計都好過被有心人上綱上線，大做文章搞批鬥。
本地各大學「肯肯定」都係梁特的目標，港大不在講，科大早已經淪陷，校董會主席自從上任主席張建東病逝後，科大上下原本預計會由副主席、唐英年堂弟唐裕年（Martin Tang）接手，但今年3月突然間空降「梁粉」廖長城，聽聞連唐裕年本人都好意外。梁特下一步要針對中大，沈祖堯同一班中大高層點會唔知？
見梁特等人對學生噓國歌窮追猛打，佢哋又點會估唔到對方嘅意圖？校長厚住臉皮打仔，都係唔想學校步港大後塵，政治鬥爭殺入校園，確實情何以堪﹗
沒有留言:
發佈留言